воскресенье, 14 февраля 2016 г.

ЗОЖ

Ми туж шер шутэтскон нуналъёсы коркан пукком. Котьку сямен кытчы ке но мыноно, мар ке но кароно.

Таиз но шутэтскон нуналъёс исключение ӧз луэ. Кӧснуналэ Якшур-Бӧдьялан ортчизы "Рассвет" газетлэн призъёсызлы 56-тӥосыз куасэн ӵошатсконъёс. Кызьы мыным шуизы, та самой массовой ӵошатсконъёс. Милям коллективмы озьы ик пыриськиз та ужрадэ. Даже мон но ортчыны кулэ вал 3 км, но висемъяськисько шуса ӧй дӥсьты. Ну зато Вася бызьылӥз. Интыос но басьтӥзы гинэ дышетӥсьёсмы. Шумпотӥсько!
Вася бызьыны дасяське

старт азьын

Глава МО "Кекоранское" но школамылэн директорез

Ӵошатсконъёс бере шумприч кошким Иже пельнянь фестивале. ПельняньКо эшъёсынымы пумиськыса ветлӥм площадетӥ, учким-марам. Туж тунсыко футболэн шудэмзы потэ вал пиослэн но, черодзэ возьмамзы ӧз поты. Самой тунсыкозэ ми кельтӥськеммы-а мар-а бер вуоннамы. Кема ӧм ӝегатске площадьын. Бер ӝытозь эшъёсын вераськыса-кенешыса пуким, куноям. Кемалась адскеммы вылэм ини.
Тупын-тупен футбол

ПельняньКо

комментарийтэк валамон)

йуухуу!


Туннэ, арнянуналэ ми ветлӥм Г. Кулакова нимо комплексэ. Отын туннэ ортчиз "Лыжня России" ӵошатсконъёс. Андрей эшмы понна "висим". Со сяна мукет но тодмоосмы бызё вылэм, соосты но поддержать карыны ӧм вунэтэ.

Сыӵе шумпотымон, машинаез кельтыны шугъяськоно шуса, сомында адями лыктэмын! Лыжня вылэ но тэшкылиосын артэ арлыдоосыз но пото. Мед эшшо тросгес калык шуныт диван вылъёсысьтызы султыса куас вылэ, коньки вылэ султылысалзы!
Кузьыли мында вогоронъёс

сыӵе мило таӵе тэшкылиосты адӟыса

Андрей! Андрей!

Зэмос удмурт "висисьёс"

пятница, 12 февраля 2016 г.

Удмурт кенеш. XIII ӧтчам

Туж противоречивый мылкыдын бертӥ вань удмуртъёслэн "Удмурт кенеш" огазеяськонлэн 13 Быдӟым съездысь. 

Мон делегат луыса ветлӥ Якшур-Бӧдья ёрослэсь. Без меня меня женили, кызьы шуо ӟучьёс. Ёрос ӧтчамын сизьым делегатъёс пӧлы ӵектӥллям но юнматӥллям мынэсьтым но кандидатураме. Ну ладно.

Якшур-Бӧдья ёросысь делегация
Президиум

Съездлэн нырысетӥ нуналаз мынам бурдъёсы ик будӥзы кадь, тани-тани лобӟо! Сомында сӥё-дано удмуртъёс люкаськемын огазе. Удмурт калыклэн йӧлвылыз. Котькудӥз доры ик лыктыса ӟечбуръяськыны но, сюлэмшугъяськытӥсь юанъёс сярысь но кенешыны капчиен луэ. Озьыен озьы но, егитэз егитсэ ик умой валалоз, мӧйыэз мӧйызэ.
Шумпотӥсько,лыктӥ шуса
Молодежной политика секцие ог 60 кузя адями люкаськиз.Секциез нуизы Ольга Тронина но Татьяна Витальевна Ишматова. Мон малпай вал, егитъёс гинэ луозы секциын. Чик но озьы вылымтэ. 23-24 арескысен 80 арозь удмуртъёс люкаськизы татчы. Соос пӧлын дышетӥсьёс но, егитъёсын ужась ӧнерчиос но, поселениосысь, ёросъёсысь тӧроос но, университетысь преподавательёс но, гожъяськисьёс но. Малпай вал, ужмы конструктивной луоз шуыса, всё-таки мӧйыос соос опытноесь, улонэз адӟымынэсь. Нош мон малпамъя, оломар сярысь вераськимы! Куддыръя верамазы асьсэ логиказылы пумит но вераны кутскылӥзы, воксё кыче ке но мукет ӧре кыскылӥзы, локальной кыӵе ке но проблемаосты сэрттыны-пертчыны выризы. Куддыръя мон валтӥсь малпанэз но веранысь висъяны ӧй быгатылы. Кыӵе ке, кыӵе ке дэмланъёс, ӵектонъёс выль резолюцие пыртыны дасямы ик. 

Ваньмызлы тодмо Альберт  Разин (хотя мон татчыозь ӧй тоды, кин со) азямы киоссэ ик сэзъяса валэктыны выриз, егит поколенилы тросгес верано Трокай Борисов, Кузёбай Герд сярысь, соослы яратон пыӵатоно шуыса. А не "секс-символ Богдан Анфиногеновез" кылзоно, лыдӟоно, и не удмурт рок-концертъёс егитъёслы лэсьтоно шуса. Выль культурае ("сисьмем запад культурае") пыртоно ӧвӧл, пе, удмурт егитъёсты. О-о, дыр. Та адями егит калыкен вераськемез но адскылэмез но ӧвӧл видимо. Кыӵе ке но шормуӵысь яке толэзьысь вуэм адями. И кин шуиз, со запад культура шуса? Мон кык киыным ик пиналъёс, егитъёс мед тодозы дано удмурт пиосмес шуыса, соос весяклы кылемын историе. Но ведь котькуд вакытлэн аслаз героез! Богдан Анфиногенов. Вот кин герой НАШЕГО времени. И СОЕ пинал калык кылзӥськоз но лыдӟоз. Кызьы сыӵе огшоры юанъёсты можно валатэк!

Ӝог-ӝог-ӝог кыӵе ке но ортчиз со секциосын ужмы. Кошконо луиз концертэ Удмурт драмтеатре. Айкайёс шоры синмаськытэк учкыны уг луы! Модалиос татын мултэсгес кадь  потӥз, тем более мар ке сураськыса ветлӥзы, музыказэс не расчитали, нылъёсы вылесь лэся, шӧдӥське. Мукет артистъёсты мон мар ке но вскользь учкиськем.

Ӝытсэ гожъяса уг улы. Вал шулдыр. Вал трос выль тодматсконъёс. 

Кыкетӥез нунал ортчиз Чайковский нимо операя но балетъя театрын.
Докладчикъёслэсь вераськемзэс кылзыса мынам сюлэмы тыриз. Мырдэм пуки бӧрдонме возьыса. Сыӵе мыным обидно луиз удмуртъёс понна, удмурт егитъёс понна! Ну кин виноват егитъёс удмурт сямен уг верасько шуса? асьсэ пиналъёссэс удмурт кыллы дышетон понна уг но малпасько шуса? Асьсэос егитъёс? Бен, но со туж отчасти гинэ. Кин дышетӥз-то милемыз удмурт кылын вераськыны? Кыӵе поколение? А соос, кин сцена вылысен дыльдыез пазяськымон кесяське удмурт кылэз дышетоно, вӧлмытоно, популяризировать (туж модной кыл) кароно шуса! Нош со адямилэн, интересно, аслаз пиналъёсыз удмурт кылын верасько меда??? Туж сомневаться кариськисько! Сыӵе бадӟым нимо дано удмуртъёслэн пиналъёссы ке удмурт кылын уг верасько, мар ини огшоры адямиос сярысь веранэз! Визьмо, дано адямиос ке ӧз быгатэ утьыны анай кылзэс асьсэ следующий поколениязы, кызьы огшоры адямиос, кудъёсыз вылэ мынэ туж бадӟым прессинг нырысь ик интернетысь но телевизорысь, сое утьыны быгатозы?...
Синъёсы котмемынэсь

Мынам туж потэ, мынам пиналъёсы анай кылынызы, удмурт кылын свободно мед вераськозы шуса! И не только семья куспын, ӝӧк сьӧрын, а садикын но, школаын но, театрын но. Та съезд бере мон малы ке но туж сомневаться кариськыны кутски...Вань со визьмо вераськонъёс мылы ке но мыным, егит адямилы, оскон ӧз сетэ.

Туж оскисько, "Удмурт кенеш" огазеяськонлэн выль азьмуртэз Татьяна Витальевна Ишматова котыраз удмурт кыл но культура понна зэмос "висись" адямиосты люкалоз шуыса. Асьме удмурт кылмы котырес ӝок сьӧрын гинэ вераськымон уз луы шуыса. Гур сурасьёс, пыд пуктӥсьёс трос, нош векчи вайёсты венике керттыса гинэ луэ выжез чылкыт ӵужыны. 

пятница, 5 февраля 2016 г.

Куасъёс али рулят

Висемъяськисько. Чырты бичатэ, ныр уг шока, кужым овол. Ладно урокъёсы трос ӧвӧл. 

Туннэ ымам жвачка поныса мынӥ, медам кызы шуыса. Ньылетӥ классысь дышетӥсьмы висьыны усиз но, удмурт кыл часъёссэ арнялы кутӥ. Пиналъёсы ужало, нош мон укное учкыса пукко. До тово урамын чебер! Лымы чебер пуж пыр кадь ваське...

- Лилия Николаевна! (блин, ымме бадӟым усьяй-а мар-а жвачка сысконнам, возьыт...) А малы вот тӥ милемыз уд лэзьке жвачкаен школае ветлыны, а асьтэос сыскиськоды? (упс!)

- Нырысь ик, вождэс эн вае... Мон ӧжыт висьыны кутски, соин ик медам кызы шуса, ымам пони вал. Мон ведь ноку но татчыозь дорады жвачкаен ӧй ветлы на?
-Ӧӧӧд!
-Нну вот! Соин ик, эшшо одӥг пол, вождэс эн вае,я.
-Ну ладно, ми тӥледыз прощаем! 
Уф! Та пиналъёсын пельдэ сак гинэ возь.

Толон школаямы ёрос ӵошатсконъёс ортчизы "Быстрая лыжня". Капчи ботинкаосын васькай ведь нюке туспуктылыны но учкыны! Туннэ куарае всё, пумен ӟазырес!
чугун сюрес уллапалан

Эшшо туннэ но Бӧдьяла куасэн ӵошатсконъёсы нуллӥ пиналъёсты! Отын но кынми на! Кынмемелэсь тросгес бен пиналъёсы понна сюлмаськи. Эстафета бызьылӥзы туннэ "Юность" линияя. 2 ныл, 2 пи кулэ вал. 6-9 классъёс пыриськизы. Сизьыметӥ классын милям чисто пиос-спортсменъёс, кык гинэ нылзы, соослэн но отын но, татын но пыриськемзы уг поты. Туж кышкаськом вал, одӥгез нылаш школае ик уз лыкты медаз бызьылы шуса но...Лыктыны лыктӥз, а бызьылыны пумитъяськиз, хотя та дырозь соин вераськемын вал...Пиос жаль ик потӥзы шоразы учкыса. Я, Бӧдьяла жингыртыса вераськи, озьы озьы шуисько, яра-а ныл интые пи мед мыноз, нырысетӥ интые ми ум претендоватьтэ. Уф! лэзизы! Табере дистанциын сюлэмшугъяськисько ини, ма каром на ай шуса, инты басьтӥзы ке. 3 интыын бадӟым отрывен мукетъёсызлэсь вуизы. Тренеръёс соку ик возмущаться кариськыны кутскизы, гадьыным султыса пиналъёсы понна дурбасьтоно вал, дыр, но...соос асьсэос но ведь валаны кулэ, озьы со не дело шуыса...Сётӥзы 4 инты. Уф! Коть озьы. 
старт азьын

Только нош кынми.

Арне нош полиатлон Бӧдьялан. Вася понна "висьыны" мыноно. 

понедельник, 13 апреля 2015 г.

Паска

Так-то ми шулдыресь- Кондратьевъёс шуыны ӧдъясько вал но...тодам лыктӥз, Широбокова ук шуыса. Сё ровно мылкыды то Кондратьевалэн кадь ик кылиз ук. 

Паска но туэ кыӵе ке сумбурногес ортчиз. Улонам кыкетсэ крестный ходэ, черке уйин ветлӥ. Кык полаз ик Кекоранэ. Кык полаз ик куашкам мылкыдын бертӥ. Мыным сомында калык пӧлы черке ветлыны уг яра, мон так но трос люкаськем калыкез уг яратӥськы но. Нош татын мынэ служба, нош адямиос оломар карыса ветло. Донгасько, оломар сярысь но верасько, серемъяськыса сыло. 

Дас кык котыре калык туж трос луиз черкын, ӧс выжыын но сыло. Нырысетӥ пол ветлыкум ми но отын сылӥмы вал. 

Потӥмы ваньмы, черк котыртӥ супыль дэрӥетӥ котырскимы, сюсьтылъёсмы тӧллэсь соку ик кысӥзы, черк дортӥ соку ик тууу! карыса поезд кошкиз.

Паска уйе черкын яке азьпалаз ик тыршоно султыны, яке кыкетӥ нуналаз ӵукна мыноно, куке калык ӧжыт.

А нош гожтэме потэ вал, пичи дыръям кызьы  Паскаез пумиталлямы сярысь. Со вал зэмзэ но семейной праздник. Дедо-бабасмылэн пиоссылэн семьяоссы котьку но доразы пумиськиськом вал. Кукеен шуккиськыса, одно ик дедолэсь окрошказэ сииськом вал. Дедо котьку пиналъёслы киндер-сюрприз кузьма вал...

Нош туэ озьы ӧй вал. Доразы ӧм пумиське. Киндер-сюрприз но ӧй вал. Мон ачим соослы шоколадной кукейес вайи ини.

Куректыны кутски вал ин но, выль  коркаын, дядямы дорын ньыль семья пумиським ик. Серекъяны но, шузияськыны но вуим.

Но со все равно уже не то
Ансамбль сумбыль-самбыль

среда, 18 марта 2015 г.

Читеръёс

Берпуметӥ арня каникулъёс азьын. Эскерон ужъёс гожъяськом пиналъёсын. Мон сыӵе контрольнойлы шум уг потӥськы вал, кызьы соос шумпото! Весь юаса уло, ку контрольной гожъялом ин шуыса.

Гожъяськон куспетӥзы ог огенызы "Читер!" шуса эшшо даллашо на. Паймисько но, серем но потэ, йыры но кур луэ, дисциплинаез сӧро шуса. Мон со кылэз университетын дышетскыкум гинэ тодӥ но, татын 3-тӥ класс ӧзьы вераське, эшшо и интыяз кылэз верало на.

-Тодӥськоды-а хоть, ма со кыл значит?-шуса юасько.
- Нечестный игрок! Чит-коды еще бывают!
- Ну, озьы ик вань, -шуисько.

Компьютерной шудонъёс соку гинэ пайда сёто, куке пинал трос ик монитор сьӧрын уг пукы, но шудэ более менее развивающий шудонъёсын. Нош ӵемысь соосты эскерисез ӧвӧл, лэся. Мама папаоссылы не до них. Соин ик поколение "читеров" будэтӥськом лэся.

среда, 11 марта 2015 г.

Папа, сыӵе папа

Папа алигес Москвае шумприч ужезъя ветлӥз. Ӝытаз пуксиз но, сояз нуналэ вуиз ини. Деловой. 

Симка, пе, мукет операторен басьто, вдруг Теле 2 уг куты. Да, шуисько, одӥг нуналлы гинэ а мар-а басьтод. Я, кошкиз но, кошкиз. Басьтӥз-а, ӧз-а выль симка- уг тодӥськы. Ӧз но вера.

Сояз нуналаз звонить карисько, карисько. Уг куты. Кысэмын, пе, телефонэз. Сюлмаськыны кутски ини. Мамалы звонить карисько, тожо пе сыӵе ик ужпум. Эшшо золгес сюлмаськыны кутски, асме кытчы поныны ик уг валаськы. Кӧня часын поезд вуэ меда шуса учкыны но сайтазы пырай ин. Вуыны но кулэ ин. Асме буйгатыны выри, телефонэз пуксиз дыр шуыса.

Куке соку мама звонить кариз но, Воткинскын ин,пе. Телефонзэ Красной площаде ыштыса кельтэм. Паймонтэм. Уф! Ярам хоть озьы.

Пумиськеммы бере, юаськи ини от души.

Ужзэ лэсьтэм но, мынэм со Красной площаде. Котырскем. Сэре мильымен чай юэм. Мильымзэ телефоназ тус пуктэм, карманаз утялтэм. Сэре эшшо поръям на. Б. Немцовез быдтэм выж вылэ но вуылэм. Карманаз пыре но-телефонэз ӧвӧл. Утчам-утчам-ӧвӧл шедьтэм. Вокзал пала мыныны кариськем, поездлэсь кылез шуса кышкаса.

Васялы шуисько, солы, пӧй, инстаграм телефоназ пуктоно. Яралоз солы.

Со нуналэ ик Элябалы папалэн номерысьтыз жингыртӥллям. Тӥляд, пе, нылды Москваын. Куке солэн куинь пи. Таиз кема малпаськытэк, мазэ-созэ валатэк, трубказэ куштэм. Мошенникъёс дыр шуыса.

Кышномурт, кудӥз шедьтэм папалэсь телефонзэ, туж сюлмо вылэм. Берпуметӥ номеръесъя жингыръям. Собере папалэн кивалтӥсез пыр, потӥллям солэн пиосыз вылэ, кудъесыз Москваын вал со вакытэ. Николай Хохряковлэн вынъёсыз, на минуточку. Соосыз ветлӥллям с о кышномурт доры, но кутӥллям со горе кнопочной телефонзэ!

Туннэ аслаз телефонысьтыз жингыртылӥз ин. 6 нунал куспын телефон-путешественницаез бертӥз кузёез доры!

Вань на дунне вылын вазиськись сюлмо адямиос! Тӥ соос пӧлы пыриськоды, дыр, ук?
селфи карыны милям со яратээээ

позировать но карыны


папина дочка

вторник, 10 марта 2015 г.

Широбокова

Туннэ нуналысен точно Широбокова. Туннэ выль фамилиеным паспортме басьтӥ ин.

Школаын дышетскыкум на, мама маке сюлмысь сюлме вераськылыкумы, шуиз вал, котькинлы бызь  но, Широбокова гинэ эн луы. Фу, пе. Малы со мыным озьы шуиз?...Вот ведь, анай кыл шуо...Татын но ведь мамалы ӧч кароно! Широбоковъёс сяна пиос ӧвӧл ведь дунне вылын))))))

Сюанлы дасяськоннам улонысь палдӥ кадь. Кыӵе ке лачак ужрадъёс ортчизы. Уж-магазинъёс-диван. Удмурт позыръяськонъёс. Уж-магазинъёс-диван. Вордӥськем нуналъёс...Номыр но кулэ ӧвӧл. Кызьы мае лэсьтоно да мае вунэтӥм на. Мандраж. Истерика. Телефон звонокъёс. Столовой. Фотографъёс. Куноос. Тамада. Вал. Сюанэ ӧтёнъёс. ЗАГС. Тол Бабай. Шыкысэ котыръёс. Залэз чеберъян. Букет. Дӥсьёс. Торт. Шампанской. Пу арбериос.

Сюанлы кык толэзьлэсь трос но ӧжыт но дасяськоно ӧвӧл. Кызьы адямиос ӝыны ар дасясько? Шузимыны можно! Нош толэзь куспын дасяськыса тоже вуттоно ӧвӧл. Дыр тууууж ӝог ортче. Али гинэ кадь кык толэзь вал, сэре толэзь, сэрэ арня, сэре кык нунал, одӥг....

И Лиля висьыны усе. Ньылонэ ӝытаз ик висе ин вал. Эшшо кык нунал сюан азьын ужъёсме лэсьтыса Шарканын ветлӥ, пыдъёсме кынтӥ. Вылаз ик туж зол стресс. Сюан нуналам, вакчияк вераса, куарае тып-тып быриз! Урод атаспи кадь чоръямъяськи гинэ на. Со вал мон понна самой секытэз...Быдэс улонэлы тодам кылёз ин, яке, кызьы обычно мынам луэ, вань умойтэмез вуноз, умоез кылёз.

Сюанмес туж уг поты вал огшоры лэсьтэм. Васяелэн кык яратонэз бере, кыксэ ик сюанамы фишка карим. Мон но пу) Мынам яратоно зарни картэ! Кыӵе со быдэс нуналъёсын пу арбериосты дасяны выриз, мискинь. Куинь арня куспын сомында лэсьтӥз! Йырсиысьтым пу розочкаосысен кутскыса, столовойысь котькуд тусьты улэ пу спилозь! 

Регистрацимы милям ортчиз Тол Бабайлэн усадьбаяз. Сыӵе чебер отын! Бадӟым пу ӧсъёсты усьтӥзы но, ми киосмес кутыса Мендельсонлэн маршезъя пушказ пырим. Мон нокинэ но уг адӟиськы кадь. Яратоно адямиелэсь синъёссэ гинэ. Чебер кылъёс верало, ваньзы пальпото, нош мон тани-тани картэлэсь кизэ лэзьыны ик кышкасько. Вань вылтырыным шӧдӥсько, тани, тани со момент, кудӥз сярысь ми ныл дыръямы сыӵе  малпаськом, кудзэ йырын сю пол ни бергатэмын! Яратоно адямие киме зол кырме, сюлме пырись, лулпушез бугыртӥсь кылъёс кисьтӥсько...Зундэсъёсмес чиньыосамы поныны косӥзы. Малпасько, али поныкум уськытӥ ке, всё! Уф, ӧй. Ваньмыз умой. Анай-атайёслы йыбырттон. Таиз, мон малпамъя, тужгес сюлэмез дэмӟытӥсь, бӧрӟытӥсь вадэсэз. Ымъёсы куалекъяны кутскизы ин, шӧдӥско ин. Ньылонам комок тубӥз ин, ымдуръёсме куртчылыны вырисько. Лиля, эн бӧрды. Возиськи. Бордам СЫӴЕ КАРТЭ сылэ ук! Соин номыр кышкыт ӧвӧл!

Собере дорамы Тол Бабай потаз. Ӟечкылаз милемыз, азьпал улонамы ӟеч кылъёс вераз. Татын эшъёсынымы ми флэшмоб эктӥм.

Ӝытэз но туж тунсыко дасяллям нылъёсы-нуисьёсы. Нош соиз сярысь мукетъяд. Мылы луиз ке.
ӵыжинъёсын букетэ

Вал

селфи эшъёсын

губки уточкой

Мон тонэ яратӥсько!